जळगाव : गेल्या काही दिवसांपासून सोन्या-चांदीच्या बाजारात सुरू असलेल्या चढ-उतारांचा परिणाम आता दरांवर स्पष्टपणे दिसू लागला आहे. सोन्या-चांदीच्या किमतीत मोठी घसरण नोंदवण्यात आली असून, ग्राहकांना काहीसा दिलासा मिळाला आहे. सोन्याच्या दरात सुमारे 4,500 रुपयांची, तर चांदीच्या दरात जवळपास 7,000 रुपयांची घट झाली आहे.
सोन्याचा प्रति तोळा दर घसरून 1 लाख 42 हजार रुपयांच्या आसपास पोहोचला आहे. तर चांदीचा दर प्रति किलो 1 लाख 83 हजार रुपयांवर आला आहे. विशेष म्हणजे, गेल्या 24 तासांत सोन्याच्या किमतीत आणखी 3 ते 4 हजार रुपयांची घसरण झाल्याचे सांगितले जात आहे.
अमेरिकेतील व्याजदरांच्या संकेतांचा बाजारावर परिणाम
आंतरराष्ट्रीय बाजारातील घडामोडींचा थेट परिणाम सोने आणि चांदीच्या किमतींवर होत आहे. अमेरिकेच्या फेडरल रिझर्व्हकडून व्याजदर वाढवण्याचे संकेत मिळत असल्याने मौल्यवान धातूंच्या दरांवर दबाव निर्माण झाला आहे. डिसेंबरमधील व्याजदरविषयक बैठकीत यापूर्वी 25 बेसिस पॉइंट्सच्या बदलाची शक्यता व्यक्त केली जात होती. मात्र, आता 50 बेसिस पॉइंट्सपर्यंत वाढ होण्याच्या चर्चेमुळे बाजारात अनिश्चितता वाढली आहे.
अमेरिका-इराण तणावाचाही परिणाम
अमेरिका आणि इराण यांच्यातील संघर्षामुळे जागतिक अर्थव्यवस्थेवरही परिणाम होत आहे. या परिस्थितीत आंतरराष्ट्रीय बाजारातील अस्थिरता कायम असून, सोन्या-चांदीच्या दरांचा पुढील कल निश्चितपणे सांगणे कठीण बनले आहे. जागतिक परिस्थितीत स्थिरता येईपर्यंत सोन्याच्या किमतीत चढ-उतार सुरू राहण्याची शक्यता व्यक्त केली जात आहे.
दरम्यान, अमेरिकन बाजार सुरू झाल्यानंतर सोन्या-चांदीच्या दरात आणखी घसरण होण्याची शक्यता वर्तवण्यात येत आहे. त्यामुळे सध्या सोने-चांदी खरेदीचा विचार करणाऱ्या ग्राहकांचे लक्ष बाजारातील पुढील हालचालींकडे लागले आहे.
