मुंबईसह महाराष्ट्रात छठपूजेच्या आयोजनावरून राजकीय वातावरण तापले असताना महाराष्ट्र नवनिर्माण सेनेचे अध्यक्ष राज ठाकरे यांनी भाजपवर जोरदार टीका केली आहे. छठपूजेच्या मुद्द्याचा वापर करून महाराष्ट्रात धार्मिक आणि सांस्कृतिक संघर्ष निर्माण करण्याचा प्रयत्न होत असल्याचा आरोप त्यांनी सोशल मीडिया पोस्टद्वारे केला आहे. दुसरीकडे, बदलापुरातील उल्हास नदीपात्रात छठपूजेच्या तयारीसाठी मोठ्या प्रमाणात मातीचा भराव टाकण्यात येत असल्याचा आरोप झाल्याने या प्रकरणाला पर्यावरणीय वादाचीही जोड मिळाली आहे.
छठपूजेच्या मुद्द्यावरून महाराष्ट्रात संघर्ष घडवण्याचा प्रयत्न? राज ठाकरेंचा आरोप
मुंबईतील काही रेल्वे स्थानकांवर भोजपुरी गाणी वाजवण्यात आल्याच्या प्रकारावर मनसेने आक्षेप घेतला होता. मनसे कार्यकर्त्यांनी या गाण्यांना विरोध करत हा प्रकार बंद पाडल्याचा दावा पक्षाकडून करण्यात आला. यानंतर राज ठाकरे यांनी सोशल मीडियावर सविस्तर भूमिका मांडत भाजपच्या राजकारणावर प्रश्नचिन्ह उपस्थित केले.
भाजप आणि त्यांच्याशी संबंधित सोशल मीडिया यंत्रणांकडून छठपूजेच्या निमित्ताने विविध व्हिडिओ आणि रिल्स प्रसारित करून महाराष्ट्रात सांस्कृतिक संघर्ष निर्माण करण्याचा प्रयत्न केला जात असल्याचा आरोप राज ठाकरेंनी केला. आगामी उत्तर प्रदेश विधानसभा निवडणुका डोळ्यासमोर ठेवून हा मुद्दा पुढे आणला जात असल्याचेही त्यांनी आपल्या पोस्टमध्ये म्हटले आहे.
‘फोडा आणि राज्य करा’च्या राजकारणावर टीका
राज ठाकरे यांनी भाजपच्या निवडणूक रणनीतीवरही निशाणा साधला. निवडणुका जवळ आल्या की वेगवेगळ्या समाजघटकांमध्ये, धर्मांमध्ये आणि जातींमध्ये मतभेद निर्माण केले जातात, असा आरोप त्यांनी केला. यापूर्वी हिंदू-मुस्लिम वाद, तसेच मुंबईतील कबुतरखान्याच्या मुद्द्यावरून गुजराती आणि मराठी समाजामध्ये संघर्ष निर्माण करण्याचा प्रयत्न झाल्याचा उल्लेख त्यांनी केला. विकासकामांच्या आधारे निवडणुका जिंकण्याऐवजी दोन गटांमध्ये संघर्ष निर्माण करून राजकीय फायदा मिळवण्याची पद्धत भाजपने अवलंबल्याचा आरोपही त्यांनी केला.
मराठी जनतेला राज ठाकरेंचे आवाहन; म्हणाले, ‘सापळ्यात अडकू नका’
या संपूर्ण प्रकरणावर प्रतिक्रिया देताना राज ठाकरे यांनी मराठी जनतेला विशेष आवाहन केले आहे. इतरांनी तयार केलेल्या संघर्षाच्या वातावरणात मराठी माणसाने अडकून पडू नये, असे त्यांनी म्हटले आहे. छत्रपती शिवाजी महाराजांच्या गनिमी काव्याचा संदर्भ देत योग्य वेळी आणि योग्य पद्धतीने उत्तर देणे आवश्यक असल्याचे त्यांनी सांगितले. सध्या शांत राहणे म्हणजे परिस्थितीची जाणीव नसणे नव्हे, तर योग्य वेळेची वाट पाहणे असल्याचा संदेशही त्यांनी दिला.
याशिवाय महाराष्ट्रातील उद्योग, जमिनी, जंगले आणि नैसर्गिक साधनसंपत्तीच्या मुद्द्यावरूनही त्यांनी राज्य सरकार आणि भाजपवर टीका केली. महाराष्ट्रातील संसाधनांचा वापर आणि राज्याच्या हिताचे प्रश्न याकडे मराठी जनतेने दुर्लक्ष करू नये, असे आवाहन त्यांनी केले.
छठपूजेच्या नावाखाली सांस्कृतिक आक्रमण सहन करणार नाही, मनसेचा इशारा
धार्मिक कार्यक्रमांना विरोध करण्यापेक्षा त्यांच्या नावाखाली कोणताही सांस्कृतिक उन्माद किंवा स्थानिक संस्कृतीला बाधा आणणारे प्रकार घडू नयेत, अशी भूमिका राज ठाकरेंनी मांडली. महाराष्ट्रातील सांस्कृतिक परंपरा आणि सामाजिक सलोखा जपण्याची गरज त्यांनी अधोरेखित केली. उत्तर भारतीय आणि गुजराती समाजालाही राज ठाकरेंनी उद्देशून राजकीय स्वार्थासाठी दोन समाजांमध्ये संघर्ष निर्माण केला जात असल्याचे सांगितले. त्यामुळे अशा राजकीय डावपेचांना बळी न पडण्याचे आवाहन त्यांनी केले.
बदलापुरात छठपूजेच्या तयारीसाठी उल्हास नदीपात्रात मातीचा भराव?
दरम्यान, छठपूजेच्या आयोजनावरून बदलापुरातही वाद निर्माण झाला आहे. उल्हास नदीकाठी होणाऱ्या छठपूजेच्या तयारीसाठी नदीपात्रात मोठ्या प्रमाणात माती टाकली जात असल्याचा आरोप उल्हास नदी बचाव कृती समिती आणि सामाजिक कार्यकर्त्यांनी केला आहे.
मिळालेल्या माहितीनुसार, जेसीबी आणि डंपरच्या साहाय्याने नदीपात्रात शेकडो ब्रास मातीचा भराव टाकण्याचे काम सुरू असल्याचा दावा करण्यात आला आहे. या कामामुळे नदीच्या नैसर्गिक प्रवाहावर आणि पर्यावरणावर परिणाम होण्याची शक्यता व्यक्त केली जात आहे. विशेष म्हणजे, उल्हास नदीचा संबंधित परिसर शासनाने ब्लू लाईन क्षेत्र म्हणून निश्चित केला असल्याचे सांगितले जाते. अशा क्षेत्रात नदीपात्रात भराव टाकण्यास निर्बंध असल्याचा मुद्दा उपस्थित करत नदी बचाव कृती समितीने या कामावर आक्षेप घेतला आहे.
प्रशासनाच्या भूमिकेवर प्रश्नचिन्ह; आयोजकांवर कारवाईची मागणी
नदीपात्रात मोठ्या प्रमाणावर माती टाकण्याचे काम सुरू असताना महसूल आणि संबंधित प्रशासनाला याची माहिती आहे का, असा सवाल नदी बचाव कृती समितीच्या सदस्यांनी उपस्थित केला आहे. या कामासाठी परवानगी कोणी दिली आणि भराव टाकण्यामागे नेमके कोण आहे, याची चौकशी करण्याची मागणी करण्यात येत आहे. नदीपात्रात नियमबाह्य पद्धतीने भराव टाकण्यात आला असल्यास संबंधित आयोजक आणि या कामासाठी जबाबदार असलेल्या व्यक्तींवर गुन्हे दाखल करावेत, अशी मागणी सामाजिक कार्यकर्त्यांकडून केली जात आहे.
कोकण महोत्सवाला मुदतवाढ नाही, मग छठपूजेसाठी विशेष तयारी का?
या प्रकरणात कोकण महोत्सवाच्या आयोजनाचाही मुद्दा पुढे आला आहे. मागील आठवड्यात याच उल्हास नदी परिसरात कोकण महोत्सवाचे आयोजन करण्यात आले होते. महोत्सवाला मिळालेला प्रतिसाद लक्षात घेता आयोजकांनी कार्यक्रमाची मुदत वाढवून देण्याची मागणी केली होती. मात्र, ही मागणी प्रशासनाने मान्य केली नसल्याचा आरोप करण्यात आला आहे.
दुसरीकडे छठपूजेच्या आयोजनासाठी नदी परिसरात मोठ्या प्रमाणात तयारी सुरू असल्याने प्रशासनाच्या निर्णयांमध्ये भेदभाव केला जात आहे का, असा प्रश्न उपस्थित केला जात आहे. छठपूजेसाठी इतका आग्रह कशासाठी आणि नदीपात्रात सुरू असलेल्या कामाला परवानगी कोणी दिली, याची उत्तरे प्रशासनाने द्यावीत, अशी मागणी होत आहे.
